“HBO” телевиз Харри Поттер цувралын гол дүрүүдэд сонгон шалгаруулалт зарлажээ

“HBO” телевиз шидтэний сургуульд өрнөх адал явдалт түүхээр телевизийн цуврал бүтээхээр Харри Поттер, Рон Уизли, Гермиона Грэйнжер нарын дүрд сонгон шалгаруулалт зарлажээ.

Студийн зүгээс олон ангит кинондоо зориулж 2025 оны дөрөвдүгээр сар гэхэд 9-11 настай байх хүүхдүүдийг хайж байгаа аж.

Сонгон шалгаруулалтад оролцох жүжигчид Их Британи, Ирландад оршин суудаг байх ёстой ч продюсерууд арьсны өнгө, үндэс угсаа, хүйсийн онцлогийн тал дээр ямар нэгэн шаардлага тавиагүй байна.

Өргөдөл хүлээн авах эцсийн хугацаа нь аравдугаар сарын 31-ний өдөр ба сонгон шалгаруулалтын зар дээр зураг авалтыг 2025-2026 онд Их Британид хийгдэнэ гэж заажээ.

“HBO”-ийн толгой компани болох “Warner Bros Discovery” өнгөрсөн жил шидтэн хүүгийн түүхээр цуврал бүтээхээр болсноо зарласан бөгөөд цуврал нь “Max” дээр долоон улирал үргэлжлэх болно. Харри Поттер номын зохиолч Ж.К.Роулинг арваад жил үргэлжлэх цувралын гүйцэтгэх продюсероор ажиллах гэнэ.

Цувралын цацагдах хугацаа тодорхой болоогүй байгаа ч “Warner Bros Discovery”-ийн гүйцэтгэх захирал Дэвид Заслав цувралыг 2026 онд гаргахаар төлөвлөж байгаагаа хоёрдугаар сард мэдэгдсэн байна.

Эх сурвалж: The Guardian