ЦЕГ: Удаа дараа гэр бүлийн хүчирхийлэл үйлдсэн 73 иргэнийг шүүхээр 7-30 хоног баривчлуулах саналыг хүргүүлэв

Өнгөрсөн 7 хоногт шалгаж шийдвэрлэсэн гэмт хэрэг, зөрчлийн тоон мэдээлэл болон шийдвэрлэсэн онцлог хэргийн мэдээлэл. 

Цагдаагийн байгууллага өнгөрсөн 7 хоногт (2026 оны 02 дугаар сарын 13-ны өдрөөс 2026 оны 02 дугаар сарын 20-ны өдрүүдэд) 191 хэргийг “Шүүхэд шилжүүлэх саналтай” Прокурорын байгууллагад хүргүүлсэн.  

Хүний амьд явах эрхийн эсрэг 3, Хүний эрүүл мэндийн халдашгүй байдлын эсрэг 62, Хүний бэлгийн эрх чөлөө халдашгүй байдлын эсрэг 10, Өмчлөх эрхийн эсрэг 68, Олон нийтийн аюулгүй байдал, ашиг сонирхлын эсрэг 1, Хүрээлэн байгаа орчны эсрэг 5, Хөдөлгөөний аюулгүй байдал, тээврийн хэрэгслийн ашиглалтын журмын эсрэг 37, Бусад 5 хэрэг байна.

Зөрчлийн шинжтэй 86.571 үйлдэлд зөрчил шалган шийдвэрлэх ажиллагаа явуулж, 86.459 зөрчлийг шийдвэрлэсэн байна. 

Нийт шийдвэрлэсэн зөрчлийн  86.066 зөрчлийг эрх бүхий албан тушаалтнаас буюу цагдаагийн алба хаагч шийдвэрлэж, 393 зөрчлийг шүүхээр шийдвэрлүүлсэн байна. 

Олон нийтийн газарт зүй бусаар биеэ авч явах 1741, Танхайрах 121, Хүний биед халдах 146, Гэр бүлийн хүчирхийлэлтэй тэмцэх тухай хууль зөрчих 146, Замын хөдөлгөөний аюулгүй байдлын тухай хууль зөрчих 83.715, бусад 702 зөрчил байна.

Эдгээрээс хүүхдийн эрхийг зөрчсөн 39 иргэнд 11.250.000 төгрөгийн торгуулийн шийтгэл оногдуулж, удаа дараа гэр бүлийн хүчирхийлэл үйлдсэн 73 иргэнийг шүүхээр 7-30 хоног баривчлуулах саналыг хүргүүлж, 26 иргэнийг 3.160.000 төгрөгөөр шүүхээр торгож шийдвэрлүүлжээ.