Ромын шинэ Папыг сонгох санал хураалт эхэллээ

Дэлхий даяар амьдарч буй 1.34 тэрбум католик шашинтнуудыг тэргүүлэх Ромын шинэ Папыг сонгох санал хураалт Ватиканд эхэллээ. Пап Францисыг таалал төгссөний дараа хоёр долоо хоногийн хугацаанд 252 кардинал Ватиканд өдөр бүр уулзалт хийж, цаашид баримтлах байр суурь, чиг хандлагаа хэлэлцсэний дүнд ийнхүү санал хураалт эхэллээ.

Систин цогчин дуганд, гадаад орчноос тусгаарлагдсан нөхцөлд шинэ Папыг олонхоороо сонгох хүртэл үргэлжлэх нууц санал хураалтад 80 нас хүрээгүй 133 кардинал албан ёсоор санал өгөх эрхтэй.

Папын албыг 12 жил хашихдаа Францис одоо шинэ тэргүүнийг сонгох эрхтэй кардиналуудын 80 хувийг өөрөө томилж байсан бөгөөд түүхэндээ анх удаа Кабо Верде, Гаити, Өмнөд Судан, Тонга, Мьянмар, Папуа Шинэ Гвиней, Руанда зэрэг орны кардиналуудыг багтааж буйгаараа онцлог юм. 

Хүн төрөлхтөнд тулгамдаж буй зөрчил мөргөлдөөн, тэгш бус байдал, байгаль орчны асуудал, цагаачлал зэрэг асуудалд нээлттэй хандах, итгэгч, сүсэгтнүүдийн оролцоог илүү их байлгах, эв нэгдэл, энх тайвныг эрхэмлэх зэрэгт кардиналууд санал нэгдэж, цаашид ч Ватиканаас ийм хандлагыг хүсэж байгааг ажиглагчид онцолж байна.

Эх сурвалж: BBC