“Жанми” хар салхины улмаас Улаанбаатар–Токио чиглэлийн нислэгүүд цуцлагдлаа

Гэрэл зургийг MPA.mn

Япон улсын Канто бүс нутгийг чиглэн ойртож буй “Жанми” хар салхины нөлөөгөөр Үндэсний агаарын тээвэрлэгч МИАТ ТӨХК 2026 оны зургаадугаар сарын 3-ны өдрийн Улаанбаатар–Токио–Улаанбаатар чиглэлийн ОМ501 болон ОМ502 нислэгүүдийг цуцалснаа мэдэгдлээ.

Тус компанийн зүгээс дээрх нислэгүүдийн зорчигчдыг зургаадугаар сарын 4-ний өдрийн нислэгт шилжүүлэн тээвэрлэх ажлыг зохион байгуулж байгаа аж.

Мөн уг нислэгийн тийз худалдан авсан зорчигчдыг тийзээ авсан борлуулалтын төвдөө хандан нислэгийн өдрөө өөрчлүүлэхийг зөвлөжээ.

МИАТ ТӨХК цаг агаарын нөхцөл байдлаас шалтгаалан гарсан энэхүү өөрчлөлтөд хүлээцтэй хандан ойлгож буй зорчигчдод талархал илэрхийлсэн байна.