17 жилийн дараа Оюутолгойн хувь нийлүүлэгчдийн гэрээнд Монголын талын өгөөжийг нэмэгдүүлэх өөрчлөлт орж байна

17 жилийн дараа Оюу толгойн хувь нийлүүлэгчдийн гэрээнд өөрчлөлт орлоо.

Монгол Улсын Засгийн газар болон “Рио Тинто” компани Оюу толгойн хувь нийлүүлэгчдийн асуудлаарх хэлэлцээний хүрээнд менежментийн үйлчилгээний зардлыг бууруулах, хувь нийлүүлэгчдийн зээлийн хүүг бууруулах талаар тохиролцоонд хүрчээ. Талууд өнөөдөр уг тохиролцоог албажуулж, холбогдох гэрээ, баримт бичгүүдэд гарын үсэг зурсан байна. Мөн “Оюу толгой” компанийн ногдол ашгийг 2027 онд хувь нийлүүлэгчдэд хүртээхэд хамтран ажиллахаа талууд баталгаажуулжээ. 

“Оюу толгой” компанийн Гүйцэтгэх захирал С.Мөнхсүх энэ талаар “Энэ ахиц дэвшил нь нэг талын бус, хамтын хүчин чармайлт. Харилцан итгэлцэл, нээлттэй яриа хэлэлцээ, шийдэлд төвлөрсөн хамтын ажиллагааны үр дүнд өнөөдрийн энэ алхам бодит ажил болж чадлаа” хэмээн онцоллоо. Ингэснээр Оюу толгойн хувь нийлүүлэгчдийн гэрээнд 17 жилийн дараа Монголын талын өгөөжийг нэмэгдүүлэх чиглэлээр тодорхой өөрчлөлтүүд албажиж байна.

Рио Тинтогийн Гүйцэтгэх захирал Саймон Троттын хэлсэн үг

Эрхэм Ерөнхий сайд таныг өнөөдөр биднийг халуун дотноор хүлээн авсанд

талархал илэрхийлье. Мөн түүнчлэн илэн далангүй, ажил хэрэгч санал

солилцсонд баярлалаа.

Юуны түрүүнд манай хоёр талын гаргасан ахиц дэвшил, урагштай хамтын

ажиллагааг энд онцолмоор байна.

Өнөөдөр бид Хувь нийлүүлэгчдийн гэрээнд дорвитой өөрчлөлтүүдийг хийлээ.

- Хувь нийлүүлэгчдийн зээлийн хүүг буурууллаа.

- Менежментийн үйлчилгээний төлбөрийг буурууллаа.

Энэ бол түүхэн мөч, маш чухал ахиц дэвшил мөн.

Бид өнөөдөр мөн Оюу толгойн хувь нийлүүлэгч талуудад ногдол ашиг хуваарилах

асуудлыг ярилцлаа.

Оюу толгойн хувь нийлүүлэгчдэд ногдол ашгийг 2027 онд хүртээхэд Рио Тинто

хамтран ажиллана гэдгийг миний зүгээс дахин баталгаажуулж байна. Манай хоёр

талын багууд энэ асуудал дээр үргэлжлүүлэн ажиллаж нэгдсэн шийдэлд хүрч

эцэслэнэ.

Харилцан итгэлцэл, бат хамтын ажиллагаан дээр суурилсан эдгээр

санаачилгуудыг амжилттай хэрэгжүүлж, Оюу толгойн өнөөдөр болон ирээдүйн

төлөө тууштай хамтран зүтгэх болно.

Эрхэм Ерөнхий сайд аа, танд болон танай хамт олонд дахин талархал

илэрхийлье.

Монголын ард түмэнд маш их баярлалаа.