Монголын тамирчдын салхийг Б.Отгонболд хагалж, өнөөдөр чансаа тогтоох харваагаа хийнэ

Гэрэл зургийг MPA.mn

“Парис-2024” олимпын наадамд өрсөлдөх Монголын тамирчдын тэмцээн уралдаан өнөөдөр эхэлнэ. 

Байт харвааны төрөлд эрх авсан ганц дайчин Б.Отгонболд өнөөдөр чансаа тогтоох харваагаа хийх бөгөөд тамирчид тус харваанд авсан оноогоороо 1-64-т эрэмбэлэгдэн жагсаж, цааш хасагдах журмаар өрсөлдөх юм.

Чансаа тогтоох харваа Улаанбаатарын цагаар 20:15-д эхэлнэ. 

Б.Отгонболдын хувьд “Токио-2020” олимпын чансаа тогтоох харваанд 646 оноо аван 54-т жагсаж, улмаар эхний даваанд БНХАУ-ын Ли Жиалунд 6:4-өөр ялагдаж байв.
Харин “Ханжоу-2022” Азийн наадмын чансаа тогтоох харваанд 662 оноогоор 15-д бичигдэж, улмаар хасагдах шатанд учраа бүрээ ялсаар түрүүлсэн юм.