Иран Ормузын хоолойг хааснаа зарлаж, дэлхийн эрчим хүчний зах зээлд түгшүүр үүсгэв

Гэрэл зургийг REUTERS агентлагийн эрхтэйгээр нийтлэв.

Иран улс Персийн буланг Оманы булантай холбодог стратегийн ач холбогдолтой Ормузын хоолойг хааснаа албан ёсоор мэдэгдлээ. Энэхүү шийдвэр нь АНУ-ын цэргийн ажиллагааны дараа гарсан бөгөөд Ираны Зэвсэгт хүчний нэгдсэн командлал хоолойгоор дамжин өнгөрөх бүх төрлийн усан онгоцны хөдөлгөөнийг хориглож, шаардлагатай тохиолдолд хүч хэрэглэнэ гэж анхааруулсан байна.

Ормузын хоолой нь дэлхийн нефть, байгалийн хийн худалдааны хамгийн чухал тээврийн гарцуудын нэг бөгөөд дэлхийн газрын тосны нийлүүлэлтийн ойролцоогоор 20 хувь нь энэ хоолойгоор дамжин өнгөрдөг. Иймээс уг шийдвэр нь олон улсын эрчим хүчний зах зээл, далайн тээвэр болон дэлхийн эдийн засагт томоохон нөлөө үзүүлэхээр байна.

Мэдэгдлийн дараахан дэлхийн зах зээл дээр газрын тосны үнэ огцом өсч, Брент төрлийн газрын тосны үнэ нэг баррель нь 95 ам.доллар давсан бол АНУ-ын WTI төрлийн газрын тосны үнэ мөн мэдэгдэхүйц өсөлт үзүүлжээ. Шинжээчид Ормузын хоолойн урт хугацааны хаалт нь эрчим хүчний нийлүүлэлтийг хязгаарлаж, инфляц болон тээврийн зардлыг нэмэгдүүлэх эрсдэлтэй гэж үзэж байна.

Харин АНУ-ын талаас худалдааны зарим усан зам нээлттэй хэвээр байгаа бөгөөд бүс нутаг дахь олон улсын усан тээврийн хөдөлгөөн бүрэн зогсоогүй гэж мэдэгдсэн байна. Гэсэн хэдий ч нөхцөл байдал хурцадмал хэвээр байгаа бөгөөд олон улсын хамтын нийгэмлэг талуудыг мөргөлдөөнийг даамжруулахгүй байхыг уриалсаар байна.

Шинжээчдийн үзэж буйгаар Ормузын хоолойн эргэн тойрон дахь нөхцөл байдал цаашид хэрхэн өрнөхөөс дэлхийн эрчим хүчний зах зээл, тээврийн салбарын тогтвортой байдал ихээхэн хамаарах юм.

Эх сурвалж: Reuters