АНУ-д Конгрессын завсрын сонгууль болж байна

Гэрэл зургийг REUTERS агентлагийн эрхтэйгээр нийтлэв.

АНУ-д арваннэгдүгээр сарын 3-нд Конгрессын завсрын сонгууль болж, сонгогчид Төлөөлөгчдийн танхимын 435 гишүүн, Сенатын 35 гишүүн болон 36 мужийн захирагчийг сонгож байна.

Энэ удаагийн сонгууль Ерөнхийлөгч Дональд Трампын бүрэн эрхийн хугацааны сүүлийн хоёр жилд Конгрессын хяналтыг аль нам хэрэгжүүлэхийг шийдэх чухал үйл явдал юм.

Reuters агентлагийн мэдээлснээр, сонгууль эхлэхийн өмнө Бүгд найрамдах нам Төлөөлөгчдийн танхимд 218:214, Сенатад 53:47 харьцаатай олонхийг бүрдүүлж байжээ. Харин Ардчилсан нам Төлөөлөгчдийн танхимд олонхоо эргүүлэн авах боломжтой гэж судалгаанууд харуулж байгаа бол Сенатын хяналтын төлөөх өрсөлдөөн ойр байна.

Сонгуулийн өмнөх кампанит ажлын үеэр иргэдийн амьжиргааны өртөг, хүнсний бүтээгдэхүүн болон орон сууцны үнэ, инфляц, цагаачлалын бодлого, Ирантай холбоотой дайны асуудал гол сэдэв болжээ.

Reuters-ийн мэдээлснээр, энэ удаагийн сонгуульд урьдчилсан байдлаар 57 сая гаруй хүн саналаа өгсөн нь 2022 оны завсрын сонгуулийн үеэр урьдчилан санал өгсөн 46 сая хүний тооноос давсан үзүүлэлт юм.

Хэрэв Ардчилсан нам Конгрессын нэг эсвэл хоёр танхимд олонх болбол Трампын засаг захиргаанд тавих парламентын хяналт нэмэгдэж, түүний бодлого, шийдвэрүүдийг шалгах боломж өргөжих юм. Харин Бүгд найрамдах нам олонхоо хадгалбал Ерөнхийлөгчийн хууль тогтоох санаачилгыг дэмжих нөхцөл үргэлжилнэ.

Сонгуулийн үр дүн АНУ-ын дотоод улс төрөөс гадна төсөв, өрийн дээд хязгаар, хиймэл оюуны салбарын зохицуулалт болон хөрөнгийн зах зээлд нөлөөлөхөөр байна.

АНУ-ын муж бүрд санал хураалт өөр өөр цагт хаагдах тул сонгуулийн урьдчилсан дүн арваннэгдүгээр сарын 3-ны оройноос гарч эхлэх бөгөөд зарим өрсөлдөөнтэй тойргийн эцсийн дүн хэд хоног үргэлжлэх боломжтой.

Эх сурвалж: Reuters