Токио орчимд хүчтэй хар салхи ойртож, нислэг болон галт тэрэгний хөдөлгөөнд саатал гарлаа

Гэрэл зургийг REUTERS агентлагийн эрхтэйгээр нийтлэв.

Японы зүүн хэсэгт хүчтэй Дужуань хар салхи ойртож, Токио болон Канто бүс нутагт аадар бороо, хүчтэй салхи шуурч эхэллээ.

Японы Цаг уурын агентлагийн мэдээлснээр хар салхи даваа гарагт буюу 9 дүгээр сарын 21-нд Идзу арлууд болон Канто бүсэд хүчтэй бороо оруулж, улмаар Токио орчимд цаг агаарын нөхцөл эрс муудах төлөвтэй байна. Мөн 9 дүгээр сарын 22-ныг хүртэл үер, хөрсний гулгалт, гол мөрний усны түвшин нэмэгдэх аюултайг анхааруулжээ. 

Одоогоор Идзу арлуудын зарим хэсэгт хөрсний гулгалтын хамгийн өндөр түвшний сэрэмжлүүлэг, Канто бүсийн зарим газарт хүчтэй аадар бороо, хөрсний гулгалт болон үерийн өндөр түвшний сэрэмжлүүлэг зарлаад байна. 

Хар салхи даваа гарагийн 13:45 цагийн орчимд Хачижожима арлаас баруун тийш 50 орчим километрийн зайд байрлаж, цагт 25 км орчим хурдтай зүүн хойд зүгт шилжиж байжээ. Төв хэсгийн агаарын даралт 960 гектопаскаль, тогтвортой салхины хурд секундэд 40 метр, хүчтэй салхины хурд секундэд 55 метр хүрч байв. 

Идзу-Ошима аралд сүүлийн 24 цагийн хугацаанд 565 мм хүртэл хур тунадас орсон бол Чиба мужийн Кимицү хотын Сахахата орчимд 279.5 мм бороо бүртгэгджээ. Цаашид Токай, Канто болон Идзу арлуудад 24 цагийн хугацаанд 250 мм хүртэл бороо орох төлөвтэй байна. 

Нислэг, галт тэрэгний хөдөлгөөнд саатал гарч эхэлжээ

Хар салхины улмаас Японы агаарын болон төмөр замын тээвэрт томоохон өөрчлөлт орж байна.

Japan Airlines 120, All Nippon Airways 140 дотоодын нислэгээ цуцалсан талаар мэдээлсэн байна. Мөн Нарита болон Ханэда нисэх буудлуудын нислэгүүдэд цаг агаарын нөхцөл байдлаас шалтгаалсан саатал, цуцлалт гарах эрсдэлтэй. 

Түүнчлэн JR East Чиба, Ибараки муж болон Токиогийн баруун хэсгийн зарим чиглэлд галт тэрэгний хөдөлгөөнийг түр зогсоож, зарим чиглэлд бүтэн өдрийн турш үйлчилгээг зогсоохоор мэдэгдсэн байна. 

Өнөөдрийн байдлаар Чиба мужийн Учи­бо, Сото­бо, Собу үндсэн, Нарита болон Кашима зэрэг шугамд хөдөлгөөн зогссон буюу хязгаарлагдсан мэдээлэл гарчээ. Мөн Токио орчмын зарим шугамд саатал болон цуцлалт үүссэн байна. 

Иргэдэд анхаарууллаа

Цаг уурын байгууллага болон орон нутгийн эрх баригчид иргэдийг шаардлагагүй тохиолдолд гэрээсээ гарахгүй байх, нам дор газар, гол мөрний ойролцоо болон хөрсний гулгалт үүсэх эрсдэлтэй бүсэд зорчихгүй байхыг анхааруулжээ.

Мөн үерт автсан зам болон ус хуримтлагдах боломжтой газар доорх байгууламж, хонгилд орохгүй байхыг зөвлөж байна. Хар салхи ойртох тусам нөхцөл байдал богино хугацаанд эрс муудах боломжтой гэж анхааруулжээ. 

Хар салхи Японд “Silver Week” буюу олон хоногийн амралтын үеэр дайран өнгөрч байгаа тул дотоодын аялал, нийтийн тээвэрт үзүүлэх нөлөө нэмэгдэх төлөвтэй байна. Мөн Токио хотод болж байсан Tokyo Game Show-ийн 9 дүгээр сарын 21-ний хөтөлбөрийг цаг агаарын нөхцөлөөс шалтгаалан цуцалжээ. 

Японд зорчиж буй иргэд, тэр дундаа Нарита болон Ханэда нисэх буудлаар нисэх зорчигчид нислэгийнхээ статусыг агаарын тээврийн компаниас тогтмол шалгаж, галт тэрэгний хөдөлгөөний хамгийн сүүлийн мэдээллийг авах шаардлагатай байна.