Киргиз Улс энэ жил даргалж буй Шанхайн хамтын ажиллагааны байгууллага (ШХАБ)-ын “ШХАБ+” өргөтгөсөн хуралдааныг “Тогтвортой энх тайван, хөгжил дэвшил, цэцэглэлтийн төлөө хамтдаа” уриан дор зохион байгуулж байна.

Гэрэл зургийг MPA.mn

Энэ удаагийн хуралдаан “Дэлхийн шударга дэг журмын гол тулгуур болох НҮБ: Олон туйлт дэлхий ертөнцийг цогцлооход ШХАБ+ орнуудын оруулах хувь нэмэр” сэдвийн хүрээнд болж байна. Хуралдаанд Хятад, Орос, Энэтхэг, Турк, Беларусь, Казахстан, Узбекистан, Тажикистан, Азербайжан, Армени, Вьетнам, Пакистан, Египет, Иран, Лаос, Того зэрэг 20 орчим улсын төр, засгийн тэргүүн, НҮБ-ын Ерөнхий нарийн бичгийн дарга Антониу Гутерреш болон олон улсын байгууллагуудын төлөөлөл оролцож байна.

Өргөтгөсөн хуралдаанаар “Бишкекийн тунхаглал” зэрэг хэд хэдэн баримт бичгийг батлахаар төлөвлөжээ. “ШХАБ+” формат нь гишүүн орнуудаас гадна ажиглагч, яриа хэлэлцээний түнш орон болон олон улсын байгууллагуудыг оролцуулж, бүс нутгийн болон дэлхийн хэмжээний асуудлыг өргөн хүрээнд хэлэлцдэг хэлбэр юм.

ШХАБ 3.4 тэрбум хүнийг хамардаг

ШХАБ-ын гишүүн болон холбогдох орнуудын хамрах нутаг дэвсгэр 36 сая хавтгай дөрвөлжин километр, Евразийн газар нутгийн ойролцоогоор 65 хувь-тай тэнцдэг. Энэ бүс нутагт 3.4 тэрбум орчим хүн амьдардаг байна.

Киргизийн хувьд ШХАБ-ын гишүүн орнуудтай хийсэн худалдааны эргэлт сүүлийн нэг жилд 23 хувиар өсөж, 7.8 тэрбум ам.долларт хүрчээ. Энэ нь тус улсын нийт гадаад худалдааны бараг 50 хувь-ийг бүрдүүлж байна.

Хятад-Киргиз-Узбекистаны төмөр замыг онцолжээ

Киргизийн хувьд хуралдааны үеэр хэлэлцэж буй эдийн засгийн гол асуудлын нэг нь Хятад-Киргиз-Узбекистаныг холбох төмөр замын төсөл юм.

20 гаруй жилийн турш яригдсан уг төслийг хэрэгжүүлэхээр Киргиз, Хятад, Узбекистан тохиролцоод байгаа бөгөөд төмөр зам ашиглалтад орсноор Киргиз Улс жилд 200-250 сая ам.долларын орлого олох, мөн 15 мянга орчим ажлын байр бий болгох боломжтой гэж үзэж байна.

Уг төмөр зам нь Хятадыг Төв Азитай холбох тээврийн шинэ коридор бий болгож, бүс нутгийн худалдаа, ложистикийн ач холбогдлыг нэмэгдүүлэх стратегийн төсөлд тооцогдож байна.