АНУ, Япон Хятад, Хойд Солонгосын заналхийллийн хариуд аюулгүй байдлын хамтын ажиллагаагаа эрчимжүүлэхээр тохиролцжээ

Лхагва гарагт АНУ-ын Батлан ​​хамгаалахын сайд Ллойд Остин, Төрийн нарийн бичгийн дарга Антони Блинкен, Японы Гадаад хэргийн сайд Хаяши Ёшимаса, Батлан ​​хамгаалахын сайд Хамада Ясуказү нар хоёр орны аюулгүй байдлын хамтын ажиллагааг бэхжүүлэх төлөвлөгөөгөө зарласан байна.

Вашингтонд болсон Гадаад хэргийн болон Батлан хамгаалахын сайд нарын уулзалтын дараа гаргасан хамтарсан мэдэгдэлд дурдсанаар хамтын ажиллагаа нь бүс нутгийн аюулгүй байдлын хамгийн том сорилт гэж нэрлэсэн Хойд Солонгос, Хятадаас ирж буй аюул заналхийллийг эсэргүүцэх зорилготой гэв.

Хамтын ажиллагааны хүрээнд Япон дахь АНУ-ын цэргийн хүчний байр суурийг сайжруулж, тандалт, тагнуул, хөлөг онгоц эсэргүүцэх, тээвэрлэх хүчин чадлыг нэмэгдүүлэхээр тохиролцжээ. Мөн Японы саатуулах хүчийг нэмэгдүүлэхийн тулд Окинава арал дээр эргийн хамгаалалтын дэглэмийг байрлуулахаар төлөвлөсөн байна.

Түүнчлэн хоёр тал сансрын хөтөлбөр хамтран хэрэгжүүлэхээр болсноо зарлажээ. Үүнээс гадна АНУ-ын сансрын агентлаг НАСА баасан гарагт Японтой хамтын ажиллагааны гэрээ байгуулахаар төлөвлөж байгааг мэдэгдсэн байна.

Энэхүү хэлэлцээр нь бараг бүтэн жил үргэлжилсэн яриа хэлэлцээрийн үр дүнд хийгджээ.

Өнгөрсөн сард Япон улс дэлхийн хоёрдугаар дайнаас хойш баримталж ирсэн энх тайванч үзлээсээ татгалзаж, батлан хамгаалахын зардлаа хоёр дахин нэмэгдүүлж, цэргийн хүчээ бэхжүүлэхээ зарласан билээ.

Блинкен Японы энэ шийдвэрийг сайшааж, дэмжиж байгаагаа хамтарсан мэдэгдлийн үеэр илэрхийлсэн байна.

Окинава мужид байрлах тэнгисийн цэргийн шинэ ангид зориулж хөлөг онгоц эсэргүүцэгч пуужингуудыг АНУ-аас нийлүүлэхээр болсон бөгөөд энэ ажлыг 2025 он гэхэд дуусгахаар төлөвлөжээ.

Гэсэн ч хоёр орны хамтын ажиллагааны хүрээнд арал дээрх тэнгисийн явган цэргийн тоог нэмэгдүүлэхгүй гэж албаны хүмүүс мэдэгдэв.

Окинава нь Тайваньтай ойр оршдог учраас АНУ-ын цэргийн Номхон далай дахь ажиллагааны гол түлхүүр гэж үздэг. Энд АНУ-ын 20,000 орчим цэргийн албан хаагч, хорь гаруй цэргийн байгууламж байрладаг байна.

Эх сурвалж: Reuters