NASA: Сарны тойрог зам руу нисэгчдийн баг илгээнэ

АНУ-ын Сансар судлалын агентлаг буюу NASA 2026 оны хоёрдугаар сард сансрын дөрвөн нисэгчийг сарны тойрог зам руу илгээхээр боллоо. Энэ нь сүүлийн 50 жилийн хугацаанд анх удаа хийж буй нисэгчтэй нислэг болох нь.

“Artemis II” нэртэй уг нислэг 10 хоног үргэлжилж, шинэ пуужин, сансрын хөлгийн аюулгүй ажиллагаа болон техникийн системүүдийг шалгах бөгөөд багийн бүрэлдэхүүнд  Рейд Уайзман, Виктор Гловер, Кристина Кох, Жереми Хансен нар багтжээ. 

NASA нислэгийн үеэр сансрын нисэгчдийн бие махбодын өөрчлөлтийг судалж, цаашдын урт хугацааны сансар судлалын төслүүдэд ашиглах мэдээлэл цуглуулах бөгөөд “Artemis II” нислэг амжилттай болбол дараагийн шат “Artemis III” төслөөр нисэгчид сарны гадаргуу дээр буух боломжтой болох аж.

Эх сурвалж: BBC