Ирэх жил бага ангийн сурагчдын үдийн хоолны зардал 5,845 төгрөг болно

Монгол Улс 2027 оноос сургуулийн хоолны зардлыг 25.4 хувиар нэмэгдүүлэхээр төлөвлөжээ.

Тодруулбал, 2027 оны төсвийн төсөлд 1–5 дугаар ангийн нэг сурагчид ногдох үдийн хоолны зардлыг 5,845 төгрөг болгон нэмэгдүүлэхээр тусгасан байна.

Олон улсын байгууллагуудын зөвлөмжөөр сургуулийн үдийн хоолны нэг хүүхдэд ногдох зардлыг өдөрт нэг ам.долларт хүргэснээр хүүхэд шаардлагатай илчлэг, шим тэжээл, амин дэмийн хэрэгцээгээ хангах боломжтой гэж үздэг.

Иймээс улс орнуудад сургуулийн үдийн хоолны зардлыг нэг хүүхдэд ногдох хэмжээгээр нэг ам.долларт хүргэх зөвлөмжийг өгдөг байна.

Энэхүү нэмэгдэл нь сурагчдын үдийн хоолны хүртээмж, чанар, шим тэжээлийн хэрэгцээг сайжруулахад чиглэж байгаа аж.