Apple: АНУ-д зарагдах ихэнх утсыг Энэтхэгт үйлдвэрлэнэ

АНУ-д цаашид зарагдах ихэнх “iPhone” утас, ухаалаг төхөөрөмжийн үйлдвэрлэлийг Хятадаас өөр улс руу шилжүүлж байгаагаа “Apple” мэдэгдлээ. Энэ тухай Гүйцэтгэх захирал Тим Кук “АНУ-д зарагдах “iPhone”-уудын ихэнх нь Энэтхэгт үйлдвэрлэгдэнэ. Мөн“iPad”, “Apple Watch”, “iMac” болон “AirPods” зэрэг төхөөрөмжийг Вьетнамд үйлдвэрлэнэ” гэжээ. 
Харин бусад улсын зах зээлд зориулсан бүтээгдэхүүнээ Хятадад үйлдвэрлэсэн хэвээр байх юм. 

АНУ-ын татварын шинэ тарифын улмаас тус компани энэ улиралд ойролцоогоор 900 сая ам.долларын нэмэлт зардал гаргахаар тооцоолж байгаагаа мөн онцолжээ. 

Татварын шийдвэрээс ч өмнө үйлдвэрлэлээ Америк руу шилжүүлэхийг Трамп тус компаниас шаардаж байсан бөгөөд “Apple” ирэх дөрвөн жилийн хугацаанд АНУ-ын хэд хэдэн мужид 500 тэрбум ам.долларын хөрөнгө оруулах төлөвлөгөөтэй байна. 

Эх сурвалж: BBC