Банкны тухай хуулийн нэмэлт, өөрчлөлтийн төслийг хэлэлцэж байна

Банкны тухай хуульд нэмэлт, өөрчлөлт оруулах тухай хуулийн төслийн хэлэлцүүлэг болж байна.

“Банкны тухай хуульд нэмэлт, өөрчлөлт оруулах тухай” хуулийн төслийг олон нийт болон холбогдох байгууллагуудаар хэлэлцүүлж байна. Монголбанкнаас мэдээлснээр уг төсөлд банкны салбарын тогтвортой байдал, засаглал, өмчлөлийн бүтэц болон хяналт зохицуулалтын орчныг боловсронгуй болгохтой холбоотой зохицуулалтуудыг тусгажээ. 

Монголбанк өнгөрсөн дөрөвдүгээр сард хуулийн төсөлд иргэд, аж ахуйн нэгж, мэргэжлийн холбоодоос цахимаар санал авах ажиллагааг эхлүүлсэн бөгөөд уг санал, зөвлөмжийг төслийн эцсийн хувилбарт тусгахаар ажиллаж байгаа юм. 

Хуулийн төслийн хүрээнд банкны үйл ажиллагааны ил тод байдал, хувьцаа эзэмшигчдийн бүтэц, банкны засаглалын шаардлагыг олон улсын жишигт нийцүүлэх асуудал хөндөгдөж байгаа талаар албаныхан онцолж байна. Мөн банкны салбарын эрсдэлийг бууруулах, харилцагч, хадгаламж эзэмшигчдийн эрх ашгийг хамгаалах эрх зүйн орчныг сайжруулах зорилго тавьжээ. 

Монгол Улсын банкны салбар нь санхүүгийн зах зээлийн дийлэнх хувийг бүрдүүлдэг учраас энэхүү хуулийн өөрчлөлт нь санхүүгийн тогтвортой байдал, хөрөнгө оруулалтын орчинд чухал нөлөө үзүүлэхээр байгааг салбарын мэргэжилтнүүд онцолж байна. 

Хуулийн төслийг олон нийтийн хэлэлцүүлгийн дараа боловсронгуй болгож, Улсын Их Хуралд өргөн мэдүүлэхээр төлөвлөжээ. 

Эх сурвалж: Монголбанк, Улсын Их Хурал