Хойд Солонгос Өмнөд Солонгосыг бай болно гэж анхаарууллаа

Хойд Солонгос Өмнөд Солонгос АНУ тэргүүтэй хамтын батлан хамгаалах тогтолцооны гол төв болж хувирвал “шийдвэрлэх бай” болно хэмээн анхаарууллаа.

Хойд Солонгосын төрийн мэдээллийн агентлагт нийтлэгдсэн тайлбарт тус улсын холбогдох байгууллагын төлөөлөгч Өмнөд Солонгосыг АНУ-ын хамтын батлан хамгаалалтын чухал төв болгон ашиглаж байна гэж шүүмжилжээ.

Тэрээр Өмнөд Солонгосын ийм үүрэг цаашид нэмэгдвэл Пёньян тус улсыг “хамтын хариу арга хэмжээний шийдвэрлэх бай” болгон үзнэ гэж мэдэгдсэн байна.

Гэрэл зургийг REUTERS агентлагийн эрхтэйгээр нийтлэв.

Энэхүү мэдэгдэл нь АНУ-ын Солонгос дахь цэргийн хүчний командлагч Өмнөд Солонгосыг “хамтын хамгаалалтын чухал төв” хэмээн тодорхойлсонтой холбоотой юм.

Хойд Солонгос мөн АНУ, Өмнөд Солонгосын хамтарсан цэргийн сургуулилалт болон АНУ-ын цэргийн хүчний байршуулалтыг шүүмжилжээ.

Пёньян аюулгүй байдалдаа заналхийлсэн аливаа үйлдлийн эсрэг хариу арга хэмжээ авахад бэлэн бөгөөд аливаа сорилтыг “хатуу няцаана” гэж мэдэгдсэн байна.

АНУ Өмнөд Солонгост Хойд Солонгосын болзошгүй түрэмгийллийг тогтоон барих зорилгоор ойролцоогоор 28 мянга 500 цэргийн алба хаагч байршуулдаг.

Хойд Солонгосын энэхүү мэдэгдэл нь одоогоор шууд цэргийн ажиллагаа эхлүүлэх тухай зарлал бус, АНУ, Өмнөд Солонгосын цэргийн хамтын ажиллагааг эсэргүүцсэн анхааруулга гэж үзэж байна.